Pambano la Dk Shein, Maalim Seif limeshaanza

Rais wa Zanzibar, Dk Ali Mohammed Shein
Rais wa Zanzibar, Dk Ali Mohammed Shein

Zanzibar. Kabla na baada ya kuandikwa kwa Katiba Inayopendekezwa, wananchi wa Zanzibar wamebaki katika kizungumkuti kupambanua, kupima na kupembua ni nani kati ya Rais, Dk Ali Mohamed Shein na Makamu wake wa Kwanza, Maalim Seif Sharif Hamad anasema kweli na kustahili kusikilizwa kwa kina cha ufahamu.

Hiyo inatokana na kauli za kukinzana ambazo zimekuwa zikitolewa na viongozi hao wakuu kupitia majukwaa ya vyama vyao vya siasa kuhusu Katiba Inayopendekezwa ambayo kwa sasa inasubiri Kura ya Maoni Aprili mwakani kama ilivyotangazwa na Rais Jakaya Kikwete.

Itakumbukwa kuwa ushindani wa kauli na hoja katika masuala makubwa ya kisiasa kutoka kwa viongozi wa vyama vya siasa ulianza mwaka 1992, wakati huo CUF kikipigania kuitishwa mkutano wa kitaifa wa Katiba, jambo halikufanywa na kiongozi yeyote, si wakati wa Rais Ali Hassan Mwinyi wala Benjamin Mkapa.

Pamoja na tume kadhaa zilizoundwa na Serikali ya Muungano na kutoa mapendekezo yake ikiwamo ya Jaji Francis Nyalali na Jaji Robert Kisanga kushauri uitishwe mkutano wa kitaifa wa Katiba na maboresho mengine, hakuna kilichofanyika.

Hata hivyo, mambo mengine ya msingi ambayo yaliibua mjadala mkubwa kutoka kwa wanasiasa ni kufanyiwa marekebisho kwa Tume ya Taifa ya Uchaguzi, wakitaka Tume Huru ya Uchaguzi, kufutwa sheria 40 za ukandamizaji, kuitishwa kura ya maoni kuhusu Muungano pia wakitoa Azimio la kutaka kuachiwa huru kwa Seif Sharif Hamad ambaye kabla ya 1992 alikuwa gerezani.

Chaguzi za mwaka 1995, 2000, 2005 hadi ule wa 2010 zilifanyika chini ya Katiba ya mwaka 1977 na kusababisha manung’uniko na lawama kutoka kwa baadhi ya vyama vya upinzani huku CCM ikiendelea kushinda kila uchaguzi katika urais.

Hata hivyo, utawala wa Rais Jakaya Kikwete ndiyo uliokuja na mpango wa uundwaji wa Katiba Mpya na kuteua Tume ya Mabadiliko ya Katiba ambayo ilikuwa na jukumu la kukusanya maoni ya wananchi, kuitishwa mabaraza ya wilaya ya Katiba, uteuzi wa wajumbe wa Bunge la Katiba na kufanyika bunge lenyewe.

Kabla ya hapo, kwa upande wa Zanzibar kilio cha upinzani chini ya CUF kilikuwa ni kutaka muungano wa serikali tatu, baadaye ikaibuka hoja ya kutaka Muungano wa mkataba kabla ya kukubaliana na hoja ya Tume ya Mabadiliko ya Katiba chini ya Jaji Joseph Warioba ya Muungano wa shirikisho wa Serikali tatu.

Hata hivyo, licha ya pendekezo hilo la Tume kukubaliwa na kuungwa mkono na vyama vya upinzani, hali ilikuwa tofauti kwa CCM na kilele cha msimamo wa chama hicho tawala kilikuwa ushauri wa Rais Kikwete alipokuwa akifungua Bunge Maalumu la Katiba alipoweka bayana kwamba chama chake kinataka kuendelea kwa mfumo wa Muungano wa serikali mbili kwa madai kwamba hauna gharama, una usalama zaidi, pia si hatarishi katika kuelekea kuvunja Muungano wenyewe. Kwa upande wa Zanzibar, hoja za pande mbili za CCM na CUF ikawa ni kulilia mafuta na gesi asilia ziliondolewe katika orodha ya mambo ya Muungano, fursa ya kukopa nje, kujiunga na taasisi za kimataifa na Rais wake awe katika itifaki ya Serikali ya Muungano kama sehemu ya mkuu wa nchi ikiwamo na nafasi za uongozi kwenye taasisi za muungano chini ya fomula maalumu.

CUF na viongozi wake wakiongozwa na Maalim Seif wakasema hawatakubali lolote hadi Zanzibar itakapokuwa na bendera yake, sarafu, benki kuu, mambo ya nje, polisi, uraia, uhamiaji na hati yake ya kusafiria.

Madai hayo yalipingwa vikali na CCM ikiongozwa na Dk Shein aliyesema madai hayo kiuhalisia yana ajenda ya siri na kulenga kuvunja Muungano wa Tanganyika na Zanzibar kwa maelezo kuwa, kuhitaji hayo yafanyike ni kuunda dola mpya ndani ya dola iliyopo.

Maalim Seif na CUF wakasema bila ya mambo hayo kuwamo kitafanya kila linalowezekana kulikwamisha jambo hilo hasa kwa kutegemea nguvu ya turufu kwenye uamuzi wa theluthi mbili ndani Bunge la Katiba.

Chanzo: Mwananchi

 

 

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s